Iloilo — Nakapuntos ang Iloilo Police Provincial Office (IPPO) sa kampanya kontra illegal nga druga.

Nadakpan kaina sang Provincial Anti-illegal Drug Special Operations Task Group (PAIDSOTG) sa pagpanguna ni Senior Inspector John Ryan Doceo si Omar Bon Lumawag sang Brgy. Paho, Lambunao nga nakuhaan sang 24 ka plastic sachet sang suspected shabu nga ginbanta nagabalor sang P30,000.

Suno kay Doceo, customer ni Lumawag ang mga estudyante kag mga out-of-school youths bangud malapit lang ang balay sini sa West Visayas State University (WVSU) Lambunao Campus.

Yara man sa watchlist sang Lambunao PNP si Lumawag kag na-monitor ang iya hulag sang nagligad nga bulan nga nagabaligya sang illegal drugs sa palibot sang eskuwelahan.

Sang Enero, kapin sa isa ka kilo sang shabu ang nakomfiscar sang PAIDSOTG sa drugbust operation sa Brgy. Tiolas, San Joaquin nga nagabalor sang masobra P5 milyon. (JoMaque)

Leave a Reply