Jeffrey Celiz, nagresign nga EA for Political Affairs ni Mayor Jed Patrick Mabilog

Iloilo City–Boluntaryo nga nag-resign si Jeffrey Celiz nga executive assistant for political affairs ni Mayor Jed Patrick Mabilog kahapon.

Suno kay Celiz, nag-lisensya siya sa alkalde nga ma-resign bangud sa delicadeza. Ini bangud nagakadalahig ang pangalan sang alkalde sa mga isyu batuk sa iya.

Gin-akusaran ni Celiz ang opposition group nga nagaguba sang iya ngalan kag naga-atake sa iya. Ginbuy-an ni Celiz sa iya nga pag-resign ang tanan nga mga obligasyon nga gintugyan sa iya ni Mabilog. Suno pa kay Celiz, indi sini luyag nga gamiton ang iya personal nga kabuhi kag mga aktibidad sa politika agud gub-on ang maayo nga imahe sang alkalde.

Suportado naman suno sa iya sang iya pamilya ang desisyon nga maghalin sa trabaho kag atubangon sang isahanon ang pagdalahig sa iya pangalan sa pila ka illegal activities sa syudad. Una na nga nalakip ang pangalan ni Celiz nga isa sa mga nag-upod kay Melvin Odicta Jr, bata ni PDEA identified top drug personality Melvin Odicta alyas Boyet sa pag-test fire sa firing range sa syudad. (Aine Grace Bravo)