PATAY

Iloilo City–Maduguon ang Valentine‚Äôs Day sang isa ka pamilya sa Barangay Aguinaldo, Lapaz kahapon matapos napatay ang mag-iloy nga gintiro sang bana antes nga gin-um-om man sang suspek ang pusil kag ginpalupok.

Sa imbestigasyon sang Lapaz PNP, gintiro ni Eduardo Cuales, 40-anyos ang iya asawa nga si Jessica Fabona Cuales, ang ila lima ka tuig nga bata nga babaye kag ang 12-anyos nga hinablos ni Jessica. Nagasakay sa trisikad ang mga biktima kag padulong kuntani sa simbahan sang ginbanggaan ni Eduardo kag ginpangtiro gamit ang 12-gauge homemade shotgun.

Ginpahayag nga pagkatapos ang pagpangluthang, gin-um-om man ni Eduardo ang kanyon sang pusil kag ginpalupok nga nagresulta man sa iya kamatayon. Gindala pa sa ospital sanday Jessica kag bata sini apang gindeklarar nga napatay alas 11:44 kahapon sang aga. Napilasan sa wala nga parte sang tiyan lapos sa tuo nga butkon si Jessica samtang wala nga parte dughan ang pilas sang 5 ka tuig nga bata. Estable naman ang kondisyon sang 12-anyos nga hinablos nga nakibyasan sa leog.

Suno kay PSINSP Edgar Anonoy, hepe sang Lapaz PNP, away sang mag-asawa sa kustodiya sang ila bata ang ginatudlo motibo sa krimen. Ginpahayag nga ginbulagan ni Jessica si Eduardo sang natukiban nga may iban ini nga babaye. Luyag nga kuhaon ni Eduardo ang ila bata pero indi magpasugot si Jessica kag indi man mag-upod ang bata sa iya amay.

Nagapati ang pamilya ni Jessica nga ginplanuhan ni Eduaro ang krimen. (Aine Grace Bravo)

Leave a Reply