San Dionisio

San Dionisio, Iloilo–Ginatugyan ni San Dionisio Vice Mayor Jun Albania sa kapulisan ang pag-imbestigar sa motibo sang paghaboy sang higko sang tawo sa opisina ni SB member Sally Lopez.

Ginkasubo ni Albania ang natabu bangud indi insakto ang ginhimo sang mga suspek sa opisyal sang banwa. Ginpahayag sang bise alkalde nga indi lang kahuy-anan ni Lopez ang natabu kundi sang bug-os nga Sangguniang Bayan sang banwa.

Nagpasalig naman si Albania nga mabulig sa pag-imbestigar agud matumod ang mga suspetsado kag mahibaluan ang motibo.

Natabu ang insidente sang Pebrero 19 sang kaagahon.

‘Anti-illegal drugs campaign’

Posible naman suno PSINSP Efren Niembra, hepe sang San Dionisio PNP, nga may kaangtanan sa ila anti-illegal drugs campaign ang motibo sa paghaboy sang higko.

Ginpabutyag ni Niembra nga ginatutukan nila ang pagpangdakup sa mga naga-engage sa illegal drugs. Posible suno sa iya nga ka-grupo sang nadakpan nila ang nahaboy sang higko kag natabuan lang nga ang opisina ni SB Member Lopez ang naigo bangud malapit ini sa higad sang karsada. (Aine Grace Bravo)

Leave a Reply