DRIVER
Ang taxi driver nga si alyas Totong.

Iloilo City — Indi magbulig ang tagdumalahan sang Arzea taxi sa driver sini nga si alyas Totong.

Suno kay Mr. Arturo Savilla, Jr., tag-iya sang Arzea taxi, kahuy-anan ang ginhimo ni Totong nga nag-ako gintuyo sini nga i-check in sa drive-in motel ang dalagita nga pasahero nga si alyas Inday.

Gin-athag ni Savilla nga wala siya nagkulang sa pagpahanumdom sa mga driver nga dapat mag-kurtesiya kag respetuhon ang kinamatarong sang pasahero.

Bangud sa abuso nga ginhimo ni Totong, wala ini sang malauman nga bulig halin sa kompaniya.

Preso sa gihapon si Totong matapos ginpadakup ni Inday sang nagligad nga adlaw sa Brgy. Benedicto, Jaro.

 

“Sorry”

Nag-sorry ang asawa sang 53 anyos nga taxi driver nga nag-ako nga nagdala sang iya menor de edad nga pasahero nga babaye sa lodging house.

Para sa iya bana nga si alyas Totong, driver sang Arzea taxi, nag-sorry si alyas Vina sa pamilya ni alyas Inday bangud sa ginhimo sini.

Suno kay Vina, gin-ako sang iya bana nga gindala sini sa motel si Inday bangud nga gin-alegar nagpakita man sang motibo.

Aminado ang ginang nga may duha ka kabataan nga lalaki sa driver nga mahilig sa babaye ang iya bana.

Sa una na nga interview kay Totong, gin-alegar sini nga gindala niya sa lodging house si Inday bangud wala man nagkontra sa iya mga istorya pero gindul-ong niya man sa Jaro sang nagbalibad sang ulihi si Inday.

Sa version naman ni Inday, ginpabutyag sini nga nagalain ang iya pamatyag sang nagsakay sa taxi gani nga natulugan siya kag nakibot sang nabatian ang tunog sang roll-up door sa lodging house gani nag-ayo siya sa driver nga idul-ong siya sa Jaro.

Gin-alegar man ni Inday nga ginhurikap siya ni Totong sa paa kag nag-ayo pa ini sang halok samtang paguwa sila sa motel.

Ginkasuhan na ang driver sang paglapas sa Child Abuse Law. (JoMaque)

 

 

0 thoughts on “Update: Tag-iya sang Arzea taxi, indi magbulig sa iya driver nga nag-ako nagtuyo sa pag-check in sa lodging house sang pasahero sini nga babaye”
  1. Kon ako operator Indi man ko magbulig Kay kahuluya gid…bilang operator man wala gid kami gakulang sang hambal sa amon mga drivers..maayo lang Kay jeep ang amon gnapabiahe..malayo sa sulay…

Leave a Reply