UPDATE: National Museum official, naghimo sang ocular inspection sa ginkutkot sa sulod sang national cultural treasure nga Camposanto de San Joaquin; Camposanto, delikado nga marumpag bangud naguba ang foundation sa ginhimo nga pagkutkot!

San Joaquin, Iloilo–Plano sang National Museum nga ibalik ang ginkutkot nga duta sa Camposanto de San Joaquin sa labing madali nga panahon sa kahangawa nga marumpag ang istruktura kon maglinog.

Ginhingyo man ni National Museum Assistant Director Angel Bautista sa local government unit sang San Joaquin nga bantayan ang lugar samtang ginaplano ang restoration. Sa ocular inspection ni Bautista sa Camposanto kahapon, nakita sini nga ginguba sang mga nagkutkot ang foundation sang istruktura.

May data na nga nakuha ang ang taga-National Museum kag iga-report ini sa ila director. Nagpabutyag si Bautista nga hatagan nila sang kopya ang LGU kag ang archdiocese sang Jaro.

Nagapati si Bautista nga treasure hunting ang tuyo sang mga lalaki nga nagkutkot sa Camposanto kon basehan ang volume sang duta nga nakutkot kag ang kadakuon kag kadalumon sang buho. (Aine Grace Bravo)