police-reportNeg. Occidental — Ginkomfirmar sang warden sang Negros Occidental District Jail sa Bago City nga na-release sang Marso 1 kag 2 ang mga suspek nga ginkasuhan sa pagpatay kay SPO2 Rex Delos Reyes sa Hinigaran, Negros Occidental.

Suno kay Jail Chief Inspector Brycel Arevalo, lakip sa mga gin-release matapos nag-plead sang guilty sa kaso nga illegal possession of firearms amo sanday Michael Jancilan sang Malipayon Delgado, City Proper sa syudad sang Iloilo; Vicente Poleros sang Brgy. Alimango, Escalante City, Negros Occidental; Eduardo Montaño sang Brgy. Hubog, Escalante City kag Openiano Dolar sang San Juan Kabankalan City apang naga-istar sa Malipayon Delgado, City Proper sa syudad sang Iloilo.

Nakaguwa suno kay Arevalo ang apat ka mga suspek paagi sa probation.

Ginpahayag ni Arevalo nga si Dolar ang na-release sang Marso 1 matapos ginserbihan ang sentensya sa illegal possesion of firearms.

Nagapabilin naman nga detained sa Negros Occidental District Jail ang isa pa ka suspek nga si Roger Garilba alyas Roger Someros sang Jelicon, Cabatuan bangud may pending nga kaso nga homicide sa Iloilo.

Gina-proseso na ang pag-transfer kay Garilba halin sa Negros pakadtu sa Iloilo Provincial Integrated Jail (IPIJ).

Magluwas sa kaso nga illegal possession of firearms, ginkasuhan man sang murder ang mga suspetsado apang nakapiyansa sang Nobyembre 11, 2015 sang tag-P200,000. (JoMaque)

Leave a Reply