Iloilo City — Napatay bangud sang pagkuga gamit ang nylon cord si Lea Sorongon Pasamonte, ang HR supervisor sang Taytay sa Kauswagan nga taga-Pototan pero nasapwan nga nagapos sa puno sang kahoy sa maligwin nga parte sang Barangay Taslan, Dumarao Capiz sang Biernes Santo.

Resulta ini sa pag-autopsy ni Dr. Owen Lebaquin, medico legal officer sang Police Regional Office 6,  sa bangkay ni Pasamonte.

Pero magluwas sa pagkuga, may mga traumatic injuries man si Pasamonte nga posible dala sang pagsumbag sa tunga sang duha ka mata, ulo, duha ka gusok kag posible man ginsipa sa ibabaw sang pigtot.

Nabali man ang tuo nga gusok sang biktima. Daku ang posibilidad suno kay Lebaquin nga ginsapote pa si Pasamonte antes ginkuga.

Indi naman mabal-an kon ginhimuslan ang biktima bangud nga yara na ini sa advanced state of decomposition sang nasapwan.

Pero nagkuha sang vaginal swab agud mapa-DNA test para sa genetic profile.

Kon basehan ang estado sang bangkay, tatlo ka adlaw na ini nga napatay antes nakita sang marso 25 suno kay Lebaquin. (JoMaque)

Leave a Reply