Iloilo City — Ginkondenar sang Tulong Kabataan Network ang maduguon nga dispersal sa linibo ka mangunguma nga nagprotesta sa main highway sa Kidapawan City North Cotabato sang biernes.

Suno kay Ms. Charmaine Chin, convenor sang Tulong Kabataan Network, lehitimo ang demand sang mga mangunguma.

Nagademand ang mga farmer protesters sang gilayon nga pagpaguwa sang el niƱo fund kag pagkaun bangud apektado ang ila mga pananum sang malawig nga dry spell.

Tatlo ka mangunguma ang napatay kag masobra isa ka gatos ang nasamaran kasunod sang pagbungkag sang mga pulis sa barikada sang mga protesters.

Nagpanawagan si Chin sang donasyon agud ipadala sa mga mangunguma nga na-apektuhan sang maduguon nga pagbungkag sang mga pulis.

Ang bulig nga matipon suno kay Chin ang ipadala nila sa Kidapawan City para sa mga mangunguma nga nagademand sang bulig sang gobyerno bangud ginagutom na sila.

“Alarming”

Ginkasubo naman ni Father Marco Sulayao sang Iglesia Filipina Independiente (IFI) ang bayolente nga pagbungkag sa pagtipon sang mga mangunguma.

Masubo katama suno kay Father Sulayao bangud lehitimo ang kawsa sang mga mangunguma pero imbes pagkaun, bala ang sabat sang gobyerno sa ila.

Maka-alarma man suno kay Sulayao bangud nakabaton man sang pamahug ang simbahan sang IFI nga gindalaganan kag ginpangayuan sang bulig sang mga mangunguma kasunod sang dispersal.

Tatlo ka mangunguma ang napatay, masobra 100 ang pilason kag may ginreport man nga mga missing kasunod sang pagbungkag sa mga nagprotesta. (JoMaque)

Leave a Reply