Dingle, Iloilo–Mga patal nga pilas sa ulo kag tiyan ang gintunaan sang kamatayon sang duha ka mga bata nga lalaki sa San Matias.

Resulta ini sang pag-autopsy ni Dr. Owen Lebaquin, medico legal officer sang Police Regional Office 6 sa 11-anyos kag 9-anyos nga mga biktima kahapon. Suno kay Lebaquin, naglitik ang ulo kag madamo sang mga pilas sa tiyan partikular sa pusod kag kilid ang duha mga bata.

Compatible suno sa iya sa narecover nga bara ang agi sang lampos sa ulo sang duha ka bata samtang compatible naman sang gamay nga kitchen knife ang agi sang mga buno. Nakita man nga may bagras sa tiil ang 11-anyos nga bata samtang may bagras sa tuo nga kamot ang 9-ka tuig nga biktima.

Posible suno kay Lebaquin nga gin-uyatan ang mga biktima samtang ginabuno kag ginalampusan sang suspek.

Nagapati naman ang kapulisan nga may partisipasyon sa krimen si alyas Charity, ang 17-anyos nga timbang sang pamilya sang mga biktima bangud inconsistent ang mga pahayag sini. Suno kay SPO2 Alejandro Loretizo sang Dingle Police Station, gin-custody nila ang timbang samtang ginatumod kon sin-o ang ginatudlo sini nga si alyas Allan nga nagpatay sa duha ka mga bata. (Aine Grace Bravo)

Leave a Reply