Candidates’ Forum sang Aksyon Radyo Iloilo kag UP sa Halalan 2016, madinalag-un nga natapos para sa mga nagapadalagan sa Pagka-kongresista sa 4th District sang Iloilo

Passi City — Madinalag-un nga natapos ang Candidate’s Forum sang Aksyon Radyo Iloilo kag UP sa Halalan 2016 para sa mga nagapadalagan sa pagka-kongresista sa 4^th district sang Iloilo sa Passi City Social Hall kaina sang aga.

Nagtambung sa forum ang tatlo tanan ka kandidato nga sanday Board Member Carmin Rita Monfort-Bautista, former Congressman Ferj Biron kag Felicito Dolar.

Ginpasalig ni Bautista nga ibalik ang legasiya sang iya amay-the late Congressman Narciso Monfort nga nagabulig sang wala pili kag ginpadayaw man ang tatlo ka ordinansa nga nahimo sini sa tatlo ka tuig nga pagpangalagad sa provincial board.

Ginpabugal naman ni Biron ang tatlo ka importante nga hagna nga iya gin-author kag nangin laye nga ginalakipan sang Cheaper Medicines Law, and laye nga nag-establisar sang Food and Drug Administration kag ang laye nga nag-convert sa Iloilo State College of Fisheries sa Iloilo State University of Science and Technology.

Gindugang sini nga nakadeliver siya sang pinakadaku nga infrastructure projects kag mga programa sa 4^th district sa iya tatlo ka termino bilang kongresista.

Ginaduso naman ni Dolar ang pagbag-o sang sistema sa pulitika. Gintumod sini ang vote buying nga iya gintawag nga illegal kag pagpangdaya.

Tiun na suno kay Dolar nga ma-untat ang pag-exploit sa mga botante paagi sa pagbakal sang ila hamili nga boto.