Mga kandidato sa pagka-mayor sa Alimodian, nangin Mainit ang Pagsabtanay sa Candidates’ Forum sang Aksyon Radyo Iloilo kag UP sa Halalan 2016

Alimodian, Iloilo — Nangin mainit ang pagsabtanay sang mga kandidato sa pagka-Mayor sa Alimodian sa Candidates’ Forum sang Aksyon Radyo Iloilo kag UP sa Halalan 2016 kaina sang hapon.

Lunsay ginpabugal nanday incumbent Mayor Geefre “Calay” Alonsabe kag former Mayor Juanito Alipao ang mga hinimuan sang ila administrasyon sa banwa.

Ginpanindugan ni Alipao nga indi basehan ang edad sa abilidad sang panghimanwa.

Gin-akusahan man sini ang iya kasumpong nga nagapang-angkon sang slogan nga gingamit niya sadtu sa iya pagpadalagan halin sang 1988.

Ginakabig naman ni Alonsabe nga asset sa iya maayo nga liderato ang matuod niya nga pagkatawo.

Ginbida sini nga may pag-ulikid sa mga imol ang iya nga liderato, nagaserbisyo sang wala sang pinili-an kag wala sang personal nga interest. (JoMaque)