Bacolod City, Negros Occidental–Duha ang patay lakip ang pulis sa shooting kag mauling incident sa guwa sang bulangan sa Barangay Pahanocoy sang Lunes sang gab-i.

Ginkilala ang mga napatay kanday PO1 Carmelo Pajarito, 27-anyos sang Sampinit, Bago City kag assigned sa Regional Public Safety Battalion sa Barotac Viejo, Iloilo kag Rex Villaluz, 43-anyos sang SP Village, Barangay Pahanocoy kag compound security sang New Negros Coliseum. Sa imbestigasyon sang Bacolod City Police Office, nagapaguwa sa bulangan ang grupo ni PO1 Pajarito kaupod ang nobya kag duha ka abyan nga sanday Raul Lobredo kag Ivan Dy sang natabu ang insidente.

Ginpahayag nga nakabais ni Dy ang grupo sang mga tambay kag mga tricycle drivers nga amu ang ginhalinan sang komosyon tubtub nga nagtapungulay kag nasapotehan si Lobredo. May nabatian nga lupok tubtub nga nalagyo pabalik sa bulangan si Dy.

Sang naka-abot ang first responders, nakita nga nagakayaon na ang compound security nga si Villaluz samtang pilason naman nga nagapanago kag nagapalupok si PO1 Pajarito. Ginhingagaw dala sa ospital ang pulis apang napatay alas 12:45 kahapon sang kaagahon bangud sang pilas sa tuo nga paa kag tiyan. Dead-on-arrival sa ospital si Villaluz bangud sang pilas sa wala nga ilok kag kilid sang lawas. May pilas kag gasgas sa lawas si Lobredo.

Na-recover sa lugar ang 9mm Glock 17 kag 45-caliber pistol ni PO1 Pajarito kag mga baseyo sang bala. Indi pa maathag kon ano ang ginbaisan ni Dy kag sang grupo sang mga tambay kag tricycle drivers kag kon sin-o ang una nga nagpalupok. (Aine Grace Bravo)

 

 

Leave a Reply