Iloilo–Tatlo ka mga pumpboats halin sa Victorias City, Negros Occidental ang ginpahayag gin-strafing sang Bantay Dagat sang probinsya nga nagresulta sa pagkapilas sang isa ka mangingisda.

Ginkonfirmar ni Provincial Administrator Raul Banias nga na-istorya sini si Mayor Juan Tan Palanca sang Victorias City tuhoy sa insidente sang nagligad nga semana. Gin-athag ni Banias nga wala sa lima ka Provincial Bantay Dagat team ang involved sa insidente kundi ang Bantay Dagat sang Ajuy ang naglagas sa mga mangingisda.

Sa report nga nakalab-ot kay Banias, nasiplatan nga illegal nga nagapangisda ang mga tripulante sang tatlo ka pumpboats gani ginlagas sang mga operatiba pero ginpahayag nga nagbato ang mga ini. Tatlo ka mga pulis ang sakay sang patrol boat sang Bantay Dagat nga ginkilala kanday PO1 Martin Baldevieso, PO1 Benjie Baludio kag PO1 Diosdado Estocado.

Ginapreparar na suno kay Ajuy Mayor Juancho Alvarez ang kaso batuk sa mga mangingisda. Gina-imbestigaran na sang Iloilo Police Provincial Office ang natabu agud mahibaluan kon sin-o ang nag-una sa pagpangtiro. (Aine Grace Bravo)

Leave a Reply