Mga pamilya nga Nadulaan sang mga Balay sa Brgy. Flores City Proper, Duha pa ka bulan nga Magatiner sa higad sang Karsada bangud wala pa sang Relocation site

Iloilo City — Posible nga mag-antus pa sang masobra duha ka bulan ang 100 ka pamilya sa Barangay Flores, City Proper matapos gin-demolish ang ila mga balay.

Suno kay barangay kagawad Nemia Escanlar, nagpahibalo ang personnel sang Iloilo City Urban Poor Affairs Office (ICUPAO) nga sa Hulyo pa mahatagan sang relocation site ang apektado nga mga pamilya.

Temporaryo nga nagbutang sang hayob-hayob ang mga apektado nga pamilya sa higad sang dalan bangud wala pa sang sayluhan nga lugar.

Nagdangup man si Escanlar sa city government apang ginapabungol-bungolan lang ang ila problema.

Ang duta nga gina-istaran sang 100 ka mga pamilya ginapanag-iyahan ni Mr. Luis Tinsay.   (JoMaque)