Iloilo City — Gin-dismiss sang Regional Prosecutor’s Office ang Petition for Review sa libel case nga gin-file sang kampo ni Melvin Odicta, ang gintudlo sang PDEA 6 nga lider sang drug group sa Iloilo, batuk kanday Aksyon Jun Capulot, Aksyon John Paul Tia kag Manila Broadcasting Company (MBC) President Ruperto Nicdao, Jr.

Sa resolution ni Regional Prosecutor Domingo Laurea Jr, nasaad nga kabahin sang public interest ang komentaryo sang mga anchormen sang Aksyon Radyo ilabe na ni Aksyon Jun Capulot, bangud si PDEA 6 Director Paul Ledesma ang nag-identify kay Odicta nga drug personality nga si alyas Dragon.

Base ini sa mga interviews sang Aksyon Radyo kay Ledesma.  Bangud sini, may kinamatarong ang publiko sa mga impormasyon may kaangtanan kay Odicta pareho sang iya mga negosyo.

Una na nga gin-dismiss sang fiskalya ang kaso nga libel ni Odicta bangud sang makaduluda sini nga kaundan sa judicial affidavit sang tagreklamo.

Gintumod ni fiscal Rysty Ann Espinosa-Borja nga maathag nga gintudluan kag nagbinutig si Odicta bangud plastado ang kada tinaga nga nabatian sini sa programa ni Aksyon Jun Capulot kag ang pag-quote sini sa kaundan sang Article 353 sang Revised Penal Code nga verbatim ukon word for word.

Gin-rason ni Odicta sa pag-file niya sang kaso amo ang pagkaguba sang iya imahe kag negosyo bangud sa mga wala sang basehan nga komentaryo. (JoMaque)

Leave a Reply