Iloilo City — Ginpapreso sang ginatudlo kerida ang anak sang iya 40-anyos nga karelasyon matapos siya ginsulong sa ila ulubrahan sa City Proper kaina sang aga.

Napuhag ang iban nga mga customer sang establisiemento sang gulpi lang ginhan-usan sang hanger ni alyas Bam-Bam 26-anyos sang San Juan Molo si alyas Chona, 26-anyos sang Dumaguete.

Suno kay Bam-Bam, nagpalangurog ang iya unod sa kaakig sang nakita ang babaye gani wala siya nakapugong kag ginhanot ini sang hanger.

Sa alegasyon ni Bam-Bam, malapit tatlo ka tuig na nga may relasyon si Chona kag ang iya amay nga foreman sa isa ka construction site sa syudad.

Nagatrabaho pa sa Saudi Arabia si Bam-Bam sang nahibaluan nga may kerida ang iya amay.

Natukiban man sini nga ginahatag sang iya amay sa kerida ang kuwarta nga iya ginapadala.

Suno pa kay Bam-Bam, nagbalos lang siya sa ginhimo sadtu ni Chona nga pagsakit sa iya iloy matapos natukiban ang relasyon sini sa iya amay.

Gin-areglo sang pulis ang duha kag gin-refer sa Barangay Lupon ang ila reklamo.

Apang nagpaandam si Bam-Bam kay Chona nga bisan ipapreso siya, indi siya gihapon mag-untat tubtub indi ini madula sa Iloilo. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply