Pagkay-o sang Drainage System sa mga National Roads sa Syudad, Malapit na lang Matapos suno sa DPWH

Iloilo City–Halos patapos na ang pagkay-o sang Department of Public Works and Highways (DPWH) sa drainage system sa mga national roads sa siyudad.

Suno kay Engr. Rodney Gustilo sang DPWH City District Engineering Office, sa karon nagahimo na lang sila sang declogging sang mga drainage bilang preparasyon sa pag-abot sang tingulan. Nagapadayon na lang ang trabaho nila sa Delgado Street, City Proper bangud bag-o lang ini gin-convert nga national road.

Na-address na suno sa iya ang problema sa Melvin Taxi compound sa City Proper bangud may ginbutang na nga dalagku nga drainage nga naga-connect sa outfall sa suba sa Diversion Road kag functional na. May mga ginatapos na lang suno sa iya ilabe na sa mga area nga may nagatindog nga poste kag may linya sang MIWD.

Tapos naman suno kay Gustilo ang obra nila sa junction sang General Luna kag Avanceña malapit sa UP City Campus.

Ginalauman ni Gustilo nga mahagan-hagan na ang pagbaha-baha sa siyudad sa pag-abot sang tingulan. Iya naman gin-athag nga indi na nila sakop ang drainage sa mga city local roads. (Aine Grace Bravo)