UPDATE: 2 ka Lalaki nga Gintapok sa Syudad kag Probinsya sang Weekend, Gintorture Antes Ginpatay Base sa Resulta sang Autopsy sa Ila Bangkay

Iloilo–Gin-torture ang duha ka lalaki nga gintapok sa Arevalo kag Leganes sang weekend.

Base sa pag-autopsy ni Dr. Noel Martinez sang PRO-6 Crime Laboratory, 18 ka mga pilas sang pagkatiro ang nakita sa bangkay ni Lou Facto, 33-anyos sang Project 5 Sooc, Arevalo nga nasapwan sa circumferential road sa San Jose, Arevalo sang Sabado sang aga. Siyam sa 18 ka mga pilas ni Facto ang patal ilabe na sa iya ulo. Agi suno sa iya sang 45-kalibre nga pusil kag 9mm ang mga pilas sang biktima.

Posible suno kay Martinez nga gin-torture si Facto kon basehan ang mga pilas sini sa paa. Si Facto ang nasapwan nga nagapos ang mga kamot sa atubang kag naputos sang packing tape ang ulo.

Nakitaan man sang mga agi sang pagtorture ang bangkay ni Sherwin Taasan sang Rizal Pala-Pala Dos, City Proper nga nasapwan sa katigbawan sa Purok 4 San Vicente, Leganes. Ginpahayag ni Dr. Martinez nga walo ka pilas sang pagkatiro ang nakita sa lawas ni Taasan.

May yara ini sang mga hanog sa butkon kag dughan kag pilas sa guya nga ginpatihan agi sang pagsumbag. (Aine Grace Bravo)