Janiuay, Iloilo–Nagpa-inject sang anti-rabies vaccine  si PSINSP Kenneth Bermejo, hepe sang Janiuay Police Station, kaupod kay PO2 Leandro Soqueña.

Kasunod ini sang pagkagat sa ila ni Barangay Kagawad Ian Balontong, 30-anyos, nga nadakpan sa buybust operation sa Barangay Sta. Rita. Ginpanugyanan sang doktor ang duha ka pulis nga magpatublok sang anti-rabies vaccine bangud may posibilidad nga matapikan sila sang rabies bisan pa tawo ang nagkagat.

Ginkagat ni Balontong si Bermejo sa dughan kag sa kamot naman si Soqueña sang tuyo ini magpanginpadlos. Nakuhaan si Balontong sang walo ka sachets sang suspected shabu, 300 pesos nga marked money kag P1, 240 nga ginapatihan benta sa pagbaligya sang illegal drugs.

‘Indi Matuod’

Todo naman sa pagpanginwala ang barangay kagawad nga nagabaligya siya sang illegal drugs. Ginduso sini nga gintanum lang ang nakuha sa iya nga mga items. Suno sa kagawad, pauli na siya halin sa pagtrabaho bilang konduktor sang depasahero nga jeep sang gindakup.

Gin-ako ni Balontong nga naka-agi siya gamit sang shabu sang una pero nagbag-o na sang nakapangasawa sa diin may duha na siya ka kabataan. Ginreklamo ni Balontong ang mga pulis nga nagkastigo sa iya kag nagbunggo pa sang iya ulo sa pader kasunod sang pagdakup sa iya. (Aine Grace Bravo)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply