(UPDATE) Nagabusong nga Pasahero, Napatay sa Pagbunggu-anay sang Duha ka Depasahero nga Jeep sa Oton Kahapon

(UPDATE) Iloilo City–Isa ka pasahero ang napatay sa pagbunggu-anay sang duha ka depasahero nga jeep sa Barangay Trapiche, Oton kahapon.

Ginkilala ang napatay kay Leny Traifalgar sang Namocon, Tigbauan. Ginhingagaw ini dala sa The Medical City pero wala gid natabangan. Si Traifalgar ang nagabusong sang apat ka bulan.

Masobra 20 pa ang ginpangdala sa mga ospital sa syudad pero anum na lang ang padayon nga ginabulong lakip ang driver sang Tigbauan nga jeep nga yara sa Iloilo Doctor’s Hospital. Detain naman sa karsel sang Oton Police Station ang driver sang Miagao nga si Kenneth Rey Nim.

Gin-ako sini nga nag-overtake siya sa isa ka salakyan pero na-alang-alang kag nagbunggo sa Tigbauan nga jeep. Padulong sa Miagao ang ginamaneho ni Nim samtang pakadto sa syudad ang Tigbauan nga jeep. (Aine Grace Bravo)