Prayer for TRO sa Operasyon sang Guimaras-Iloilo Ferry Terminal, Ginbawi sang Guimaras Provincial Government

Guimaras–Gin-withdraw sang Guimaras Provincial government ang Prayer for Temporary Restraining Order (TRO) sa korte agud kuntani punggan ang operasyon sang Guimaras-Iloilo Ferry Terminal (GIFT).

Suno kay Guimaras Board Member kag Vice Governor-elect John Edward Gando, ginbawi nila ang Prayer for TRO matapos nag-manifest si Iloilo City Legal Officer Dan Dinopol nga indi mapasiraduhan sang joint venture agreement sang syudad kag Double Dragon Properties Corporation, developer sang GIFT, ang Parola kag Ortiz Wharves. Wala man sang legislative action suno kay Dinopol halin sa City Council nga magapasira sang duha ka dungkaan sang mga pumpboats halin sa Guimaras.

KON magpasar gid man ang City Council sang resolution nga siraduhon ang Parola kag Ortiz Wharves, magahimo sang legal action ang Guimaras Provincial government suno kay Gando.

‘Limbong’

Gin-akusaran ni Iloilo City Councilor Ed Peñaredondo ang Double Dragon nga naglimbong sa syudad bangud wala nagsunod sa plano sa proyekto. Ginpalab-ut sang konsehal sa mga abogado sang developer nga sanday Atty. Jonathan Umali kag Atty. Jay Ugalingan ang iya obserbasyon sang nag-ocular inspection sa GIFT nga wala gid sang nakay-o sa terminal kag sa baylo, ang City Mall lang ang ginpagwapo.

Nagpasalig naman ang mga abogado nga ipalab-ut sa ila kliyente ang concerns sang City government. (Aine Grace Bravo)