Iloilo City — Ginkumpirmar sang pamilya sang seaman nga si Kim Jalbuna, 26 anyos sang Ungka 1, Pavia, nga napatay ini matapos ginreport nga nahulog halin sa walo ka panalgan nga apartment sini sa Ermita, Manila.

Nakatawag pa si Jalbuna sa iya ginikanan kahapon sang kaagahon kag naga-ayo nga sugaton siya sa Manila bangud malain gid ang iya pamatyag.

Las 8 kahapon sang aga, naglupad pa-Manila ang amay sini pero las 9 sang aga, nakabaton sang tawag halin sa police ang pamilya sa Iloilo nga patay na si Jalbuna.

Si Jalbuna ang manugbalik kuntani sakay sa barko sa Hunyo 27.

Indi pa maathag kun aksidente nga nahulog ukon may nagtiklod sa biktima.

Sa panaysayon sang iloy nga si Lita, ginpahayag sini nga naghakos gid sa iya ang anak kag namangkot pa kun san-o naman sila makakitaay sang nagbiya ini pa-Manila.

Aaminado man ang iloy nga gusto kuntani kuhaun ni Kim ang Criminology nga kurso kag indi nautical course sang nag-eskwela ini sa kolehiyo.

“Bulig ni Mayor”

Gilayon nagtanyag sang bulig si Pavia Mayor Mike Gorriceta sa pamilya sang seaman nga napatay matapos nahulog sa building sa Manila.

Ginpakadto sang alkalde ang pamilya ni Kim Jalbuna sang Ungka 1 Pavia sa opisina sang iya amay, Congressman Arcadio Gorriceta para maproseso ang pagpabalik sang bangkay sang 26 anyos nga seaman sa Iloilo.

Indi pa gid maathag kun paano nahulog halin sa ika-walo nga panalgan sang ginateniran niya nga apartment sa Ermita Manila si Jalbuna.

Ginahibalo naman sang kapulisan kun may foul play sa iya kamatayon. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply