UPDATE: 5 Pesos Terminal Fee sa Guimaras-Iloilo Ferry Terminal, Unacceptable sa mga Guimarasnon–Guimaras Vice Governor John Edward Gando

Indi mabaton sang mga Guimarasnon ang lima ka pesos nga terminal fee nga gintanyag sang Double Dragon Properties Corporation, ang developer sang Guimaras-Iloilo Ferry Terminal.

Reaksyon ini ni Guimaras Vice Governor John Edward Gando sa kumpirmasyon ni Atty. Mark Piad, spokesperson ni Mayor Jed Patrick Mabilog, nga nagpasugot ang Double Dragon nga panubuan sa lima ka pesos halin 11 pesos ang terminal fee sa mga maga-agi sa GIFT kon magpadulong sa Guimaras. Ginsulit ni Gando nga zero terminal fee ang luyag sang mga Guimarasnon kag ang indi pagpasira sang Ortiz kag Parola Wharves.

Suno pa kay Gando, daku nga problema kon magdungka ang mga pumpboats sa GIFT sa Parola area bangud magalapas ini sa franchise nga ginhatag sang MARINA. Mas luyag suno sa iya sang mga pumpboats nga magpabilin sa Ortiz kag Parola Wharves bangud libre na kag safe pa. (AGB)