Pagpasar sang Ordinansa nga Nagahatag sang Frangkisa sa Double Dragon Properties Corp. agud Mag-operate sang GIFT, Wala nadayon

Iloilo City — Wala nadayon ang pagpasar sang city council sang ordinansa nga nagahatag sang frangkisa sa Double Dragon Properties Corporation agud mag-operate sang Guimaras Iloilo Ferry Terminal (GIFT).

Nagpamat-ud si Councilor R Leone Gerochi, chairman sang Committee on Public Utilities sang city council nga indi na lang pag-ipasar ang ordinansa bangud indi sini makuha ang mayoriya sang mga konsehal.

Magluwas kanday Councilors Plaridel Nava kag Joshua Alim, indi man pabor sa ordinansa sanday Councilor Armand Parcon, Ed Peñaredondo, Liezel Zulueta-Salazar kag Jeffrey Ganzon.

Ginakuwestyun nanday Nava kag Alim ang gina-request ni Mayor Jed Patrick Mabilog sa city council nga hatagan sang franchise ang Double Dragon bangud gin-una ang paghiwat sang committee hearing sang sa application. (JoMaque)