Lambunao, Iloilo–Nakalab-ot na sa atensyon ni Iloilo Schools Division Superintendent Dr. Myrna Castillo ang paguramusay sang school principal kag district supervisor sang Agosto 12.

Ginmanduan ni Castillo ang legal division sang Department of Education 6 nga imbestigaran ang insidente sa tunga nanday Mrs. Aida Palomar, principal sang Don Eugenio Ladrido Memorial Elementary School, kag Dr. Dolorita Manzano, ang District Supervisor. Nagpadulong sa opisina ni Castillo ang bata ni Palomar kag nagsumiter sang incident report samtang naghingyo naman si Manzano nga imbestigaran ang insidente.

Base sa impormasyon nga nakalab-ut sa Aksyon Radyo, nag-ugat ang gamo sang makaduha ka beses nga ginpatawag ni Dr. Manzano si Palomar sa iya talatapan agud hibaluon ang status sang ginahingagaw nga Enhanced School Improvement Plan apang wala nagpakita ang principal.

Sang naguwa si Manzano sa iya opisina agud kuntani magkuha sang bulak, nasiplatan sini sa guwa si Palomar gani iya ginpamangkot kun ngaa wala nagpakita sang iya ginpatawag. May nagluntad nga pagbaisay tubtub nga naguramusay ang duha ka babaye.

May mga gasgas sa lawas si Dr. Manzano samtang na-ospital naman si Palomar. Nagalaum naman si Dr. Castillo nga ma-areglo ang isyu bangud wala sang may maayo nga resulta kon magkasuhay sila. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply