Banate, Iloilo–Indi matuod ang report nga may patay nga nabuhi kahapon. Pagtadlong ini ni Rose Badinas, tag-iya sang Badinas Funeral Homes sa diin gindala ang bangkay sang 56-anyos nga si Evangeline Espada sang Barangay Libertad, Banate nga una na ginpahayag nga nabuhi pero napatay liwat.

Suno kay Badinas, gindiretso sang pamilya sa punerarya ang bangkay ni Espada matapos ini gindeklarar nga dead-on-arrival sa Barotac Viejo District Hospital bangud nga na-high blood. Gin-athag ni Badinas nga posible yara pa sa denial stage ang pamilya sa natabu gani nga sa guwa pa lang sang punerarya, gin-alalayan nila ang lawas nga makapungko kag ginpa-inom sang kalawag.

Luyag lang athagon ni Badinas nga wala pa man naka-abot ang ila embalsamador sang gindul-ong ang lawas ni Espada gani wala sang kamatuoran ang una naglapta nga balita nga nagkuyampad ini sa sobra nga kakulba bangud nga nagpanguy-ab ang bangkay.

Ginpadulungan man sang municipal health officer si Espada kag iya ginkonfirmar nga patay na ini. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply