Mga Distrito sa Syudad nga may Gamay nga Numero sang Drug Users nga Nagapa-rehab sa Drop-in Centers, Plano nga Kadtuan ni Mayor Jed Patrick Mabilog

Iloilo City–Plano ni Mayor Jed Patrick Mabilog nga kadtuan sa masunod nga semana ang mga distrito nga wala naga-comply sa target nga numero sang mga drug users nga nagapa-rehab sa drop-in centers.

Kasunod ini sang pagkadismaya sang alkalde sa resulta sang programa sa diin diutay lang nga mga users ang nagapa-rehab partikular sa mga distrito sang Lapaz, Mandurriao, Lapuz kag Arevalo. Suno kay City Health Officer Dr. Bernard Caspe, updon sang mayor ang taga-DILG sa paglibot sa nasambit nga mga distrito kag kuhaon ang commitment sang mga punong barangay para sa drug rehabilitation program.

Sa records sang City Health Office,  244 ka mga drug users ang nagkadtu sa mga drop-in centers sa una nga adlaw sang rehabilitation sang Setyembre 1. Nagnubo ini sa 177 sang Setyembre 2 kag 160 ka users sang Setyembre 5 samtang naglab-ot naman sa 261 ang mga drug users nga nagpa-rehab sang Setyembre 6.

Una na ginpabutyag ni Mabilog nga mangin wala sang pulos ang programa kun indi pagsuportahan sang mga punong barangay. (AGB)