PAMILYA JABLO, NAGHINGYO KAY ICPO DIRECTOR REMUS ZACHARIAS CANIESO NGA BUTANGAN SANG MGA PULIS ANG DESAMPARADOS, JARO

Iloilo City–Nagdangup kay Iloilo City Police Office (ICPO) Director PSSUPT Remus Zacharias Canieso ang pamilya Jablo kag naghingyo nga butangan sang pulis ang Desamparados, Jaro.

Nagakabalaka ang pamilya Jablo sa ila seguridad bangud sang sunod-sunod nga insidente sa ila. Ginpanghiwala naman ni Punong Barangay Noemi Jablo nga involved sa illegal drugs ang iya bayaw nga si Carcar Jablo nga gintiro patay sang riding-in-tandem sang damlag lang. Wala man sang may ginsugid ang pamilya Jablo kay Canieso sang motibo sang pagpatay kay Carcar.

Una nga nabiktima sang riding-in-tandem ang bayaw sang kapitan kag utod ni Carcar nga si Ryan “Arsaf” Jablo nga nakibyasan sa butkon sang gintiro sa relocation site sa San Isidro, Jaro.

Ginatugyan ni Canieso sa hepe sang Jaro Police Station ang pagbutang sang mga pulis sa Brgy. Desamparados. (AGB)