(UPDATE) PO1 nga Gintudlo Nagtiro Patay sa Tag-iya sang Videokehan sa Concepcion, May Problema sa Pamatasan–IPPO Director

Iloilo–Ginpasalig ni Iloilo Police Provincial Office (IPPO) Director PSSUPT Harol Tuzon nga mapasakaan sang kaso si PO1 JV Longno nga gintudlo nagtiro patay sa tag-iya sang videokehan sa Barangay Loong, Concepcion nga si John “Junjun” Namud.

Kaso nga murder kag frustrated murder ang ipasaka batuk kay Longno. Ginpasalig ni Tuzon nga sa iya liderato, indi pag-tolerahon ang mga pulis nga salawayon kag abusador.

Suno pa kay Tuzon, may problema sa pamatasan si Longno bangud napa-idalum na ini sa Character Aptitude Development Enhancement Training ukon CADET.

Dead-on-arrival sa Sara District Hospital si Namud bangud sang pilas sa ulo. Padayon naman nga ginabulong sa Western Visayas Medical Center ang kaupod ni Namud nga si Lyndy “Kano” Franco nga may pilas sa paa.

Suno sa asawa ni Namud, naakig ang pulis bangud wala ginpasugtan sang iya bana nga mag-extend sa pagkanta. Ini bangud nagasunod sila sa curfew sa barangay nga tubtob lang alas-10 sa gab-i. (AGB)