Operation Bakal, Ginhingyo ni Councilor Joshua Alim nga Ibalik sang ICPO

Iloilo City–Ginhingyo ni Councilor Joshua Alim si Iloilo City Police Office Director PSSUPT Remus Zacharias Canieso nga i-reactivate ang ‘Operation Bakal’ bilang kabahin sang saturation drive sang kapulisan sa tanan nga establisimento sa syudad kun gab-i.

Sa sulat nga ginpadala ni Alim kay Canieso, ginpabutyag sang konsehal nga katuyuan sang iya request nga matapna ang mga krimen sa syudad. Kasunod ini sang mga gamo ilabe na sa Smallville Complex sa Mandurriao nga pinaka-ulihi ang shooting incident nga nagresulta sa kamatayon ni Vincent Albert Tan sang Ticud, Lapaz.

Ginpasiguro naman ni Alim nga wala sang may malapas nga human rights sa tion nga mag-conduct ang operations.

Ginhingyo ni Alim nga himuon ang saturation drive halin alas-10 sa gab-i tubtub alas-3 sa kaagahon. Masami nga may mga krimen nga ginadalahigan sang mga hubog sa amo nga time period.

Dapat himuon nga regular ang pag-conduct sang Operation Bakal suno kay Alim kag indi pagkatapos sang krimen. (AGB)