Iloilo — Kalab-anan sa mga pumuluyo sa Bingawan ang relihiyoso gani daku nga factor kun ngaa wala sang drug surrenderer ukon wala sang may gin-Tokhang sa banwa.

Paathag ini ni Mayor Mark Palabrica kun ngaa drug-free ang Bingawan sugod sang ginpatuman ang Oplan Double Barrel sang Philippine National Police.

Kasunod man ini sang report ni Iloilo Police Provincial Office Director Harold Tuzon sa ginlunsar nga Mamamayan Ayaw sa Anomaliya, Mamamayan Ayaw sa Illegal nga Druga ukon MASA MASID nga zero drug surrenderer ang Bingawan.

Suno sa alkalde, makabig nga Christian community ang banwa kadungan sang pagtukod sang Bingawan Baptist Church kag 80% na sang mga residente sa Poblacion ang Baptist.

Magluwas sini, cooperative man ang mga pumuluyo ilabe na sa Anti-Drug Abuse Campaign sang banwa.

Ginpabugal man ni Palabrica ang 2010 Galing Pook Award nga nakuha sang banwa bangud sang kooperasyon sang mga pumuluyo.

Numero uno man suno sa iya sa transparency program sang gobierno ang banwa.

Gindeklarar nga drug-free municipality ang Bingawan sang panahon pa ni former IPPO Director Cornelio Salinas. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply