Iloilo City – Wala sang tuman nga halit sa propiedad kag kabuhi ang naglabay nga bagyo Marce sa isla sang Panay kag Guimaras. Suno kay Office of the Civil Defense ukon OCD6 Director Rosario Cabrera, ang suspension sang klase kag cancellation sang byahe sang mga sakayan dagat kabahin lang sang precautionary measures nga ginhimo sang gobyerno.
Samtang 44 ka mga pumpboat ang nagkalaguba sa Northern Iloilo kag anum ka mga mangingisda ang luwas na kag nakita na ang duha ka mga tawo nga missing sang nagligad nga adlaw.
Na stranded man ang mga salakyan sa boundary sang Calinog kag Passi City matapos naglapaw ang tubig sa taytay. Wala sapayan nga ginpa-idalom na lang sa Public Storm Signal Number 1 ang isla sang Panay, ginpa-alerto sa gihapon ang mga pumoloyo sang probinsya.
Ginpanugyan ni Provincial Disaster Risk Reduction and Management Officer Jerry Bionat ang mga pomoloyo nga naga estar sa kilid sang bukid nga mag-evacuate bangud mahimo nga matiphag ang duta sa padayun nga pagtupa sang ulan.
Ginpanugyan man ni Bionat ang mga pomoloyo nga naga estar sa higad sang suba nga magsaylo sa mataas nga lugar.
Ginbuksan naman ang Moroboro Dam sa Dingle agod indi mag-awas ang tubig. Ginpahayag ni Dingle Municipal Disaster Risk Reduction and Management Officer Haji Calanao nga sa 13 ka gate sang dam ,walo ang ginbuksan bisan pa nga manubo ang level sang tubig.
Nagpamat-od ang National Irrigation Administration ukon NIA nga buksan ang dam agod indi mag-awas ang tubig kag magbaha sa mga kabanwahanan sang Pototan , Barotac Nuevo, Dumangas, Zaraga kag Leganes.
(Aljohn Torreta)
 

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply