Nagpakilala nga Pari, Ginpapriso sang Pulis nga Nagreklamo nga Nagsakit kag Nagpangilkil sa Iya
Iloilo City — Ginpreso ang nagpakilala nga pari nga ginreklamo sang babaye nga pulis sa lapaz nga nagsakit kag nagpangilkil sa iya.
Suno kay PO2 Neneng, nakilala niya sa social media ang nagpakilala nga si Reverend Father Eljune Lumbo sang Purok 20 Calachuchi Bukana Davao City.
Naghapit lang sa Iloilo halin sa Manila si Lumbo suno kay PO2 Neneng gani nga iya ginbuligan nga may madayunan.
Ginpahayag sang pulis nga nagahatag siya sang kwarta sa pari bilang bulig man pero nag-abot sa punto nga ginagamit sang suspek ang iya motorsiklo kag ginpilit siya nga ihatag ang isa sa mga cellphones niya.
Kahapon, ginbawi ni PO2 Neneng ang cellphone pero nagbalibad suno sa iya si Lumbo gani nga nag-agaway sila.
Nakuha suno sa iya ni Lumbo ang iya pusil kag ginpa-um-om sa iya pero iya nga gintapi.
Dugang sang pulis, ginsumbag kag gintampa pa siya ni Lumbo antes nagdalagan pero iya ginlagas.
Ginbuligan si PO2 Neneng sang iban nga tawo tubtob nga nadakpan si Lumbo nga preso na sa karsel sang La Paz Police Station. (JoMaque)
Best am station keep it up.