Mga kahoy sa General Luna Street, indi matandog sa paghimo sang drainage suno sa DPWH

Iloilo City–Pagalikawan sang Department of Public Works and Highways ukon DPWH ang mga kahoy sa General Luna Street para sa construction sang drainage.

Suno kay DPWH-Construction Division Assistant Chief Ormel Santos, wala ginpasugtan sang City Council nga pang-utdon ang mga kahoy sa General Luna. Mangita na lang sila sang paagi suno kay Santos agud indi matandog ang mga kahoy sa ila pagtukod sang proyekto.

Maga-construct ang DPWH sang 1.2 by 1.2 meter box-type drainage halin sa University of the Philippine pakadto sa University of San Agustin.  Ilisan suno sa iya sang box-type ang mga pipe-type drainage agud maka-akomodar sang mas dako nga volume sang tubig.

Ang construction/rehabilitation sang drainage sa General Luna, Jalandoni, JM Basa kag Rizal Streets nagsugod sang Disyembre 9 subong nga tuig kag matapos sa Disyembre 9, 2017.

Una na nga gin-rehabilitate ang drainage sa General Luna bangud nga puno na sang lay-on. (AGB)