Fake rice?

Pavia, Iloilo–Nagreklamo ang mag-asawa sa Barangay Pandac nga nagbutod ang tiyan matapos nagkaun sang ila ginapatihan nga fake rice.

Suno kay Rody Macasinag, ginkumparar nila ang gintig-ang nga bugas sa kan-on sang ila kasilingan kag natalupangdan nga lain ang hitsura. Nagduda pa sila sang nag-umpok ang kan-on nga ila ginbilog-bilog kag ginlampos sa salog.

Bisan ang tubig nga ginkilisan sang bugas suno kay Macasinag ang masinaw sa baylo nga maputi nga daw gatas.

Nagsakit man ang tiyan sang umagad nga lalaki ni Macasinag nga nakakaun sang kan-on.

“Wala sang fake rice”

Indi peke ang bugas nga gintig-ang sang pamilya Macasinag suno sa National Food Authority 6. Nagpadulong sa NFA 6 ang tagreklamo apang nagpangayo sang complaint letter ang opisina suno kay Macasinag.

Apang sa initial nga obserbasyon sang NFA, well-milled rice ang nabakal ni Macasinag.

Ginpasiguro man sang NFA ang publiko nga wala sang naga-egsister nga fake rice sa rehiyon. (AGB)