Oton, Iloilo — Patay ang mag-asawa nga ginpangbuno sa sulod sang ila balay sa Caboloan Norte Oton kahapon sang aga. Nagabarikutot kag pareho nga tata sang buno sanday Woodrow, 49-anyos, kag Jonita Bechayda, 47-anyos, sang naabtan sang ila mga kasilingan. Suno kay chief tanod Jonel Prologo, bag-o lang abot halin sa pagbakal sang isda sa banwa si Woodrow samtang nagapaligo sa banyo si Jonita sang ginbuno sang suspek nga si Reno Casaria. Si Casaria ang kasilingan sang mga biktima kag bilas ni Woodrow bangud mag-utod si Jonita kag asawa sang suspek.

Nagpalagyo ang suspek pagkatapos sang krimen pero nagsurrender kay Monsignor Meliton Oso sa Jaro Archdiocesan Social Action Center ukon JASAC bangud diri nagatrabaho ang iya asawa. Preso na si Casaria sa Oton Police Station matapos ginturn-over ni ICPO Director Remus Zacharias Canieso kagab-i.

Nahinulsol naman si Casaria sa ginhimo nga krimen. Suno sa iya, masami sya nga ginagarit-garit sang biktima rason kun ngaa na-impito ang suspetsado. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply