Arbitration Tribunal, nagpaguwa na sang desisyon sa ginfile nga kaso sang bulk water supplier batuk sa MIWD

Iloilo City–Nagpaguwa na sang desisyon ang Arbitration Tribunal angut sa gin-file nga kaso sang Flo Water sa Metro Iloilo Water District sang nagligad nga tuig.

Base sa arbitral award ukon desisyon sang tribunal suno kay Atty. Roy Villa sang MIWD, nagpamat-od ini nga take or pay ang kontrata sa tunga sang MIWD kag Flo Water kag dapat nga magbayad sang 164 million pesos ang water district sa bulk water supplier. Apang magadepende sa Commission on Audit ang pagdesisyon kun mabayad ukon indi ang MIWD sa Flo Water.

Ginpa-athag sa desisyon nga Government-Owned and Controlled Corporation ukon GOCC ang MIWD gani may hurisdiksyon dire ang COA.

Nagsugod ang problema sang indi ma-akomodar sang injection point sang MIWD sa Leganes ang 15 thousand cubic meters per day nga water supply sang Flo Water.  Bangud sini, nahimo lang nga 6 thousand cubic meters per day ang napasulod sang Flo Water sa MIWD halin Pebrero 16, 2013 tubtub Enero 30, 2016.

Ginrason naman sang Flo Water nga kinahanglan magbayad ang MIWD bisan pa nga 6 thousand cubic meters lang ang ila napasulod bangud sa take or pay nga kontrata. Ini ang rason nga nagtukod sang arbitration tribunal ang duha ka partido agud solbaron ang issue. (AGB)