Iloilo City–Ginareklamo ang mahigko nga pedestrian overpass nga may elevator sa Diversion Road sa San Rafael, Mandurriao. Matag-as nga hilamon kag basura ang nagabalandra sa mga tawo nga nagalabay sa pedestrian overpass.

Malabayan man kun kaisa nga may mahamuok nga nagakatulog sa overpass kag may tiun nga tuman ka pangsot. May impormasyon man nga may kabastusan nga ginahimo ang pila ka pamatan-un sa overpass ilabe na sa tungan gab-i kag kaagahon.  Nagpadala si DPWH City District Engineering Office Head Engr. Rodney Gustilo sang tinawo agud tinluan ang overpass samtang wala pa naturnover sa City government.

Nagpa-athag naman si DPWH 6 Assistant Regional Director Engr. Al Fruto nga sang nagligad nga tuig pa kuntani ang turnover kadungan sang center island nga may mga tanum nga palma. Pero napatay ang pila ka royal palms bangud sa masingkal nga init gani wala nadayon ang turnover. Tinguhaan suno kay Fruto sang ila talatapan nga maproseso na ang mga papeles para sa turnover samtang ilisan subong nga bulan ang mga royal palms nga nagkalamatay.

Ang overpass nga nagalaba sang 50.235 meters kag nagasangkad sang tatlo ka metro kag ginpondohan sang 20 million pesos. Ginalauman maturnover ang maintenance sa city government antes matapos ang Agosto. (AGB)

 

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply