NA-UTOD NGA ULO SANG REBULTO SANG ILONGGO NGA BAGANIHAN

Leon, Iloilo–Nakibot ang taga-Leon sang nakita nga nakakas na ang ulo sang rebulto sang baganihan nga si Captain Jose Cabalfin Calugas sa Calugas Park sa nasambit nga banwa.

Suno kay SPO4 Jose Romel Samson, OIC sang Leon Police Station, posible aksidente ang natabu bangud indi papwersa ang pagkakas sang ulo sa lawas. Natukiban sang lunes sang maintenance personnel sang parochial school malapit sa park nga wala na ang ulo sang rebulto.

Ginhatagan ni Mayor Rolito Cajilig sang pito ka adlaw ang mga pulis agud imbestigaran kon sin-o ang nag-utod sang ulo. Si Captain Calugas nga tumandok sang Barangay Tagsing, Leon ang labing una nga Filipino nga soldado nga nakabaton sang medal of honor sang World War II.

Ang rebulto naman sini nga human sa clay, ginhimo ni Architect Alan Cabalfin nga tumandok man sang Leon..// Ginhatag ni Cabalfin ang rebulto sa local government unit sang Leon sang Disyembre sang nagligad nga tuig. (AGB)