Magtiya, nadakpan sa entrapment operation sang PDEA matapos gintudlo nga nagtuyo mag-areglo sa kaso sang ila himata

Iloilo City–Nadakpan ang magtiya nga gintudlo nagtuyo sa pag-areglo sa kaso sang ila himata sa entrapment operation sa City Proper kaina sang aga.

Suno kay Philippine Drug Enforcement Agency ukon PDEA 6 Director Wardly Getalla, nag-areglo sa balor nga P300,000 ang magtiya agud panubuan sang PDEA agent ang ginpasaka nga kaso batuk sa ila himata nga na-aresto may kaangtanan sa illegal nga druga.

Ginkilala ang mga nadakpan sanday Ginibon Ali kag Roben Shaik, lunsay pumuluyo sang Pilintangan Wao, Lanao del Sur. Si Ali ang iloy nanday Kalil Ali kag Tony Ali nga preso sa Bureau of Jail Management and Penology sa Ungka, Jaro.

Nakuha sa mga nadakpan ang P100,000 nga pauna nga bayad sa ginpahayag areglohanay kag duha ka cellphones. Natalana pasakaan sang kaso nga corruption of public official ang mag-tiya. (AGB)