Pavia, Iloilo — Ginpaguwa sang Pavia police ang facial composite sketch sang duha sa lima ka suspek sa tuyo nga pag-abduct sa 19-anyos nga estudyante nga babaye sa Ungka II sang Setyembre 28 sang gab-i.  Suno kay Chief Inspector Fernan Limbungan, hepe sang Pavia Police Station, nahuman ang facial sketch sa bulig ni alyas Lynlyn nga nagpadulong sa police station kahapon. Nagahingyo si Limbungan sang bulig sang publiko agud makilala kag madakpan ang mga suspek.

Base sa panaysayon ni Lynlyn, ang babaye nga suspek nagataas sang 5’3 tubtob 5’4, medium built, may malaba nga blond nga buhok, ginabanta 40 tubtob 45 anyos kag Tagalog ang panghambal. Ang lalaki naman nga nagtiklod sa iya pasulod sa salakyan, 5’8 ang kataason, ginabanta 40 tubtob 45 anyos kag Hiligaynon ang panghambal.

Isahanon nga nagabantay si Lynlyn sang nagdulog ang itom nga van, nagpanaug ang lalaki nga nagkadto sa iya likod kag nagtiklod sa iya pasulod sa salakyan. Ginpabutyag sang dalaga nga gintayaan siya sang pusil, ginpahug nga patyon, ginbuyayaw kag gintuyo nga ubahan gani nagbato siya tubtob nakatiempo nga nabuksan ang puertahan kag nakalumpat sa Green Meadows Subdivision sa Jaro. Nagkalagisi ang bag kag bayo ni Lynlyn samtang nakuha ang iya wallet. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply