Governor Arthur Defensor Nagapati Nga Na-Clear Na Ang Mga Alkalde Sa Probinsya Nga Una Na Ginhingadlan Ni Presidente Rodrigo Duterte Nga Narco Politicians
Province of Iloilo – Nagapati si governor Arthur Defensor nga na-clear na sa illegal nga druga ang tatlo ka mga alkalde sa probinsya nga gintawag ni presidente Rodrigo Duterte nga narco politicians. Kasunod ini sang pagpahanugot sa ila nga makasumpa sa PDP-LABAN.
Suno kay Defensor, si house speaker Pantaleon Alvarez ang nagpahibalo sa iya nga puwede na makasumpa sa partido sanday Maasin mayor Mariano Malones, Calinog mayor Alex Centena kag Carles mayor Sigfredo Betita.
Ginbasehan suno sa iya ni Alvarez ang bag-o sini nga record sa tatlo ka mga mayor. Sa Nobyembre 23, magasumpa si governor Defensor upod ang iya mga bata nga sanday 3rd District Congressman Arthur “Toto” Defensor kag board member Lorenz Defensor sa PDP-LABAN.
Ginakalipay ni Calinog mayor Alex Centena ang posibilidad nga na-clear na ang iya pangalan sa narco list ni Duterte base sa pagpati ni governor Defensor.
Apang mas maayo pa gid suno sa alkalde kun may dokumento nga pirmado sang DILG nga magapamatuod sang pag-clear sang iya pangalan. Ginpabutyag ni Centena nga malawig ang iya pag-antos sa pag-tag sa iya ni Duterte gani nagakadapat lang nga mahatagan man siya sang hustisya.
(ATT)