Mga kontrabando, nakumpiskar sa greyhound operation sa Iloilo District Jail kaina sang kaagahon

Pototan, Iloilo–Narecover ang madamo nga mga kontrabando sa greyhound operation las 5:30 kaina sang kaagahon sa Iloilo District Jail sa Barangay Nanga, Pototan.

Lakip lang sa nakit-an sa mga selda ang cellphone, tooter, mga sigarilyo, binangon, martilyo kag lagare.

Ginpangunahan ni BJMP 6 Deputy Regional Director for Administration Jail Supt Gilbert Peremne ang pag-usisa sa tanan nga mga selda upod ang K9 team. Ginhimo ang greyhound operation isa ka adlaw matapos gintingub sa isa lang ka selda ang 13 ka mga high value target drug personalities kahapon. Kasunod man ini sang pagkatukib sang walo ka sachets sang suspected shabu sa Selda 51 nga ginateniran sang mag-amay nga Marque ‘Boboy’ Acap kag Marque ‘Boyet’ Acap Jr nga pareho may kaso sa illegal drugs.

Apat man sa pito ka preso nga ginpa-idalum sa random drug test lakip si Acap Jr ang nagpositibo. (AGB)