Iloilo City — Magahiwat sang transport caravan protest subong nga adlaw ang Piston-Panay sa nagkalain-lain nga mga terminal sa syudad.  Suno kay Mr. Edgar Salarda, presidente sang grupo, sa baylo, magahiwat sang untat-byahe nga lihok sang grupo sa bug-os nga pungsod, transport caravan protest ang himuon sa Western Visayas. Ini bangud may mga naka-schedule na nga aktibidad ang grupo suno kay Mr. Salarda antes pa man napat-od ang lihok.    Alas 8 subong nga aga masugod ang caravan protest sang grupo sa Mohon Terminal nga pagasundan sa San Pedro Terminal, Hibao-an Terminal, Ungka Terminal kag Tagbac Terminal.

Ginpaathag ni Mr. Salarda nga ang protesta ang pagkondena sa padayon nga pagtaas sang produktong petrolyo kag natalana nga pag-implementar sang excise tax sa produktong petrolyo kag pag-phase out sa mga public utility vehicles nga naga-edad 15-anyos kag pasaka sa masunod nga tuig.

 

“No work”

Nag-anunsyo ang city government kag provincial government nga wala sang trabaho subong nga adlaw bangud sang nationwide transport strike.   Kasunod ini sang pagdeklarar sang Malacañang nga suspended sa bug-os nga pungsod ang government work kag klase sa pampubliko kag pribado nga mga eskwelahan sa tanan nga lebel.  Apang suno kay City Administrator Hernando Galvez, may duty ang mga drivers kag miembro sang City Disaster Risk Reduction and Management Office.         Dugang niya, bukas man ang tanan nga mga facilidad nga nagahatag sang serbisyo sa ikaayong lawas.  Suno naman kay Provincial Adminstrator Raul Banias, magapadayon man ang paghatag sang serbisyo sang mga ospital sa probinsya.     Wala na nag-obra sang contingency plan ang provincial government suno kay Banias bangud wala man sang grupo ukon asosasyon sa Iloilo nga maga-upod sa untat-byahe. (JoMaque)

 

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply