Level sang tubig sa suba sa Passi City kag San Enrique, nagtaas; pila ka barangay, ginbaha

Iloilo — Nakugmat ang mga pumuluyo sa pila ka barangay sa Passi City kag San Enrique matapos nagtaas ang lebel sang tubig sa suba. Suno kay Passi City Mayor Jesry Palmares, tubtob sa tuhod ang lebel sang tubig sa pila ka porsyon sang Brgy. San Roque kag Poblacion Ilawod pasado alas 10 kagab-e. Ginpaathag ni Mayor Palmares nga wala pa siya nagmandu nga mag-evacuate ang mga apektado nga mga pumuluyo apang handa kag nagamonitor sa lugar ang Municipal Disaster Risk Reduction and Management Council ukon MDRRMC agud gilayon nga magresponde. Suno naman kay Chief Inspector Elmer Magbanua, officer-in-charge sa Passi City Police Station, nagtaas man ang lebel sang tubig sa suba sa Brgy. Gines kag Man-it apang wala sang dapat kabalak-an. Samtang nag-evacuate naman ang pila ka mga pumuluyo sa Brgy. Imbang-Pequeño kag Compo sa San Enrique. Suno kay Senior Inspector Norbert Sipole, officer-in-charge sa San Enrique Municipal Police Station, masami nga ginabaha ang amu nga mga lugar. Nagpasalig si Sipole nga nagamonitor ang MDRRMC kag pulis agud maseguro ang safety sang publiko. Nagtaas ang lebel sang tubig sa suba sa nasambit nga mga lugar kasunod sang pagbundak sang ulan. (JoMaque)