Iloilo–Ginkakibot ni San Enrique Mayor Trixie Fernandez ang report ni Iloilo Police Provincial Office ukon IPPO Director PSSUPT Marlon Tayaba nga isa ang ila banwa sa mga may presensiya sang armado nga grupo sa probinsiya.

Suno kay Fernandez, nakibot gid siya bangud wala man sang report nga nakalab-ut sa iya. Sa Peace and Order Summit sa San Dionisio sang damlag lang, ginpresentar ni Tayaba sa mga alkalde nga may pito ka armado nga grupo sa probinsiya, apat sa mga ini ang naga-operate sa Quinto Distrito ilabe na sa Lemery, Sara, Estancia kag San Rafael. Nareport man ang presensiya sang armed groups sa San Enrique kag Pototan.

Plano ni Mayor Fernandez nga magpakig-angut kay Tayaba agud mahibaluan kun ano ang ginbasehan sang IPPO sa paghambal nga may armed groups sa banwa.

‘Wala sang report’

Wala naman sang nabaton nga report si Lemery Mayor Ligaya Apura parte sa ginpahayag presensiya sang goons sa banwa. Ini ang rason kun ngaa ginkatingala ni Apura ang report ni Tayaba nga may presensiya sang armado nga grupo ukon goons sa Lemery.

Magluwas sa report ni Tayaba, wala suno kay Apura sang anuman nga impormasyon nga nakalab-ut sa iya parte sa ginpahayag armed groups.

Posible suno kay Apura nga ginbasehan ang natabu sang 2013 sang ginpatay ang iya bana nga nagakandidato sadto. Napreso na ang nagpatay sa bana sang alkalde nga miyembro sang Balume Criminal Gang suno sa mga pulis. (AGB)

 

    

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply