Mga flower vendors, ginpahanumdom sang City Government nga magbaligya lang sang bulak sa gindesignar nga mga lugar subong nga Fiesta Minatay

Iloilo City–Ginpahanumdom sang City Government ang mga flower vendors nga magbaligya lang sa gindesignar nga mga lugar.

Suno kay Mr. Jeck Conlu, head sang Public Safety and Transportation Management Ooffice,  pahalinon sang iya mga personnel ang mga nagabaligya sang bulak sa mga indi gindesignar nga lugar bisan pa may permit. Indi man pagpasugtan ni Conlu nga okuparon sang mga nagabaligya ang bilog nga karsada. Suno sa iya, portion lang sang karsada ang puwede mabaligyaan.

Kun magpakatig-a suno kay Conlu ang mga nagabaligya sang bulak, mapilitan ang iya mga personnel nga gub-on ang ila kiosko.

Base sa Executive Order 101 nga gin-issue ni Mayor Joe Espinosa, ang mga gindesignar nga lugar para baligyaan sang bulak umpisa subong nga adlaw tubtub Nobyembre 1 amu ang barangay Katilingban sa Molo; Oñate, Mandurriao; EL 98, Desamparados kag Seminario sa Jaro; Lapaz Maket; Sta. Filomena, Arevalo; Aldeguer kag Rizal Streets ukon sa guwa sang Iloilo Central Market sa City Proper. (AGB)