Iloilo–Nag-ilis sang security agency ang Savannah Subdivision kasunod sang serye sang kaso sang pagpangawat sa nakaligad nga binulan.

Ginkumpirmar ni Mr. Louie Guillarte, officer-in-charge sang Global Land Property Management, nga tikang ini sang tagdumalahan agud ipakita nga nagahulag sila agud matapna ang pagpangawat. May ginahimo suno sa iya nga internal investigation ang management agud matumod kon sin-o ang nagapangawat.

Mas hugot naman ang ginapatuman nga security measures pareho sang ID system. Ginapangayuan ang nagasulod sang ID kag ginahatagan sang color coded ID. Ginapabuksan man ang bintana sang nagasulod kag nagaguwa nga salakyan. Gina-check naman ang schedule sang streetlight agud mahibaluan kon diin nga area ang madulom kag mapabutangan sang dugang nga suga. Samtang padayon ang ginahimo nga perimeter fence sa subdivision.

Nobyembre 1 sang natabu ang pinaka-ulihi nga pagpangawat sa Savannah Orchard C nga sakup sang Abilay Norte, Oton. Suno sa tagreklamo nga si alyas Keenan, nadula ang ila 44-inch tv, DVD players, iban pa nga appliances kag pagkaun sa sulod sang ref. Na-disappoint si Keenan bangud nagpabutyag ang guwardya nga wala niya nakita ang suspek ukon mga suspek. (AGB)

 

 

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply