Mga Police Officers 1 nga wala nagarespeto sa ila senior officers, dapat disiplinahon suno sa IPPO

Iloilo — Dapat disiplinahon ang mga police officers 1 nga wala nagarespeto sa ila senior officers.  Ginpanugyan ini ni Supt. Elmer Armada, Deputy Provincial Director for Administration sa Iloilo Police Provincial Office, sa mga team leaders kag chiefs of police sa command conference sang nagligad nga semana. Na-obserbahan ni Armada nga nagapungko sa sulod sang patrol car kag nagapa-‘aircon’ ang mga PO1 kon may checkpoint samtang ang ila mga senior officers ang nagapulaw.  Magluwas sini, ginlaygayan man ni Armada ang mga hepe nga magpamati sang maayo kag mag-take note kon may command conference agud mahangpan nila ang ginahatag nga instructions ni IPPO Director Marlon Tayaba.

Kulang sa kortesiya

Na-obserbahan ni Iloilo Police Provincial Office Director Marlon Tayaba ang kakulang sang kurteseya sang mga Police Officers 1 sa mas may mataas nga ranggo sa ila.  Ginhalimbawa ni Tayaba ang protocol sa PNP organization nga pagsalute sa senior officer. Ginpa-athag ni Tayaba nga ranggo kag indi tawo ang ginasaluduhan bisan pa nga mahambal ang PO1 nga mas maalam siya sa senior officer. Ginpa-athag naman ni Tayaba nga may merit kag demerit system ang PNP. Kon mas madamo ang demerit pareho sang kapaslawan nga magsalute sa mas mataas ang ranggo, mahimo ini ma-convert sa community works ukon pagtrabaho sa kampo pareho sang pagpaninlo kag pagpananum. Halimbawa naman sang merit ang paghimo sang kaayuhan.

Pwede pa matadlong

Pwede pa matadlong ang indi ensakto nga pamatasan sang mga bag-uhanon nga pulis.  Suno kay  Tayaba, nakadepende sa chiefs-of-police ang pagdisiplina sa ila mga tinawo agud masiguro nga ginasunod nila ang code of conduct sang PNP organization. Wala sang malain suno kay Tayaba nga i-remind ang mga PO1 sa paghatag sang kurteseya sa ila senior officers agud madumduman nila kag ma-execute kon may masugata nga mas mataas ang ranggo.  Gina-engganyo naman ni Tayaba ang mga senior officers nga tindugan ang ila ranggo. Una na nga ginhambalan ni Supt. Elmer Armada, Deputy Provincial Director for Administration sang IPPO, ang mga hepe nga disiplinahon ang mga PO1 nga wala naga-salute sa ila senior officers. (JoMaque)